«O‘zbekiston qimmatli qog‘ozlar bozorining jadal rivojlanayotgani haqida ishonch bilan aytish mumkin. Mustaqillik yillarida mamlakatda qimmatli qog‘ozlar bozorini bevosita tartibga soluvchi 160 dan ortiq normativ hujjat qabul qilindi. Yaqin va uzoq xorijdagi ayrim mamlakatlar fond bozorlaridan farqli ravishda, chiqarilayotgan barcha qimmatli qog‘ozlar vakolatli organlarda ro‘yxatdan o‘tkaziladi, emitentlar esa real faoliyat yuritishi va investorlar manfaatlariga nisbatan mumkin bo‘lgan firibgarlik holatlari bo‘yicha sinchiklab tekshiriladi. O‘zbekistonda «MMM», «Tibet», «Torgoviy dom Selenga», «Olbi Diplomat» kabi kompaniyalarning paydo bo‘lishi deyarli imkonsiz bo‘lib qoldi. Respublikadagi aksiyadorlik jamiyatlarining katta qismi davlat korxonalari bazasida tashkil etilgan bo‘lib, ular asosiy va aylanma kapitalga ega. Aksiyadorlik jamiyatlarining mutlaq ko‘pchiligi real mahsulot ishlab chiqaradigan va real xizmatlar ko‘rsatadigan ishlab chiqarish yo‘nalishidagi korxonalardir. Bu, shubhasiz, milliy fond bozorining inqirozsiz rivojlanishi uchun zamin yaratadi».